'U VIERNU
Ghè bintitre ricembre e bbena bbierni
e ccu ru viernu c'è ru friddi forte:
cc'è chini a ra finestra ha mis'u pierni
e chini ha chius'a porta.
Ghè bielli quanni fà na matinata
senz'aviri pagura i na burrascca;
truovi ca tutti i fonti sù gilati
e 'ru ff à nenti ca nu pochi 'ntrascchi.
I fafarielli sù 'ncalamuisciati,
u passaricchi cerca ru mangiari;
chini si senta aggrufulunatu
trasa ghintri ppi ssi quariari.
Ghè bielli 'u vierni!
quanni vena sira, ravanti u fuculari,
ccu nu cippunu ca fà ancuna stizza,
e mienzi muorti i suonni, tu ti tiri
nu buoni litri i vini e tre mboste i sazizza.
